శ్వేత వర్ణం - అనంత గమనం: ఒక ఫిజియోథెరపిస్ట్ జీవన ప్రయాణం

శ్వేత వర్ణం - అనంత గమనం: ఒక ఫిజియోథెరపిస్ట్ జీవన ప్రయాణం

వేదికపై ఉన్న పెద్దలకు, మార్గదర్శకులైన గురువులకు, తమ కలలు నిజమవడాన్ని గర్వంగా చూస్తున్న తల్లిదండ్రులకు మరియు రేపటి భారతదేశాన్ని నడిపించబోతున్న నా యువ మిత్రులందరికీ నమస్కారం.

ఈ రోజు ఇక్కడ మనం కేవలం ఒక తెల్లని కోటు వేసుకోవడానికి మాత్రమే రాలేదు. ఈ రోజు మనం ఒక మహాత్కార్యం కోసం మనల్ని మనం అంకితం చేసుకుంటున్నాము. ఈ వైట్ కోట్ వెనుక ఒక అద్భుతమైన అర్థం ఉంది, మీ చేతుల్లో ఒక దైవిక శక్తి ఉంది.

1. చేతిలో దైవం - స్పర్శలో ఔషధం

మన ఋగ్వేదం ఒక గొప్ప సత్యాన్ని చాటి చెప్పింది:

"అయం మే హస్తో భగవాన్ అయం మే భగవత్తరః |

అయం మే విశ్వభేషజోయం శివాభిమర్శనః ||"

దీని అర్థం ఏంటో తెలుసా? "నా చేయి ఒక ఔషధం... నా చేయి ఒక దైవం." ప్రపంచంలో మందులు నయం చేయలేని ఎన్నో గాయాలను మీ 'స్పర్శ' నయం చేస్తుంది. అందుకే ఆయుర్వేదం "వాయురేవ గతిః" అంది. గాలి లేకపోతే ప్రాణం లేదు, శరీరంలో గతి (చలనం) లేకపోతే జీవం లేదు. ఎక్కడైతే ఒక మనిషి కదలిక ఆగిపోతుందో, అక్కడ రోగం మొదలవుతుంది. ఆ ఆగిపోయిన గమనాన్ని మళ్ళీ పునరుద్ధరించే మీరు, సాక్షాత్తు ఆ వాయుదేవుడి ప్రతినిధులు.

2. గెలుపు గుర్రాలను పరుగులెత్తించే శిల్పులు

సాధారణంగా మనం జబ్బు చేస్తే డాక్టర్ దగ్గరికి వెళ్తాం. డాక్టర్ మందులు ఇచ్చి ప్రాణాన్ని నిలబెడతారు. కానీ, ఆ ప్రాణానికి 'చలనాన్ని' ఇచ్చేది మాత్రం మీరే. ఆపరేషన్ థియేటర్లో సర్జన్ యుద్ధం గెలిచి రావచ్చు... కానీ ఆ గెలుపు గుర్రాన్ని మైదానంలో పరుగులెత్తించేది ఫిజియోథెరపిస్ట్ మాత్రమే.

ఒక్కసారి ఆలోచించండి...

• డాక్టర్ అలీ ఇరానీ: కపిల్ దేవ్ నుంచి సచిన్ టెండూల్కర్ వరకు ఎందరో దిగ్గజాలు గాయపడితే, వారిని మళ్ళీ మైదానంలోకి పంపి సెంచరీలు కొట్టేలా చేసింది ఆయన చేతులే. "శరీరం ఒక దేవాలయం, దానిని పునర్నిర్మించే శిల్పి ఫిజియోథెరపిస్ట్" అని ఆయన నిరూపించారు.

• డాక్టర్ గ్లాడ్రీస్ జోసెఫ్: ఎందరో అథ్లెట్ల కెరీర్‌లు ముగిసిపోతాయనుకున్న తరుణంలో, స్పోర్ట్స్ ఫిజియోథెరపీతో వారిని మళ్ళీ ట్రాక్ మీద నిలబెట్టారు.

• డాక్టర్ కేతన్ భట్వడేకర్: వెన్నెముక సమస్యలతో ఇక నడవలేం అనుకున్న వేలమందికి తన మ్యాన్యువల్ థెరపీతో శస్త్రచికిత్స లేకుండా పునర్జన్మను ఇచ్చారు.

3. విశ్వ గమనానికి - మీ గమనానికి ఉన్న సంబంధం

మనిషి తనంతట తాను నడవాలన్నా... ఈ భూమి తన చుట్టూ తాను తిరగాలి. ఈ భూమి మనల్ని మోస్తూ సూర్యుడి చుట్టూ పరిగెత్తాలి. అక్కడ విశ్వంలో గురుత్వాకర్షణ శక్తి (Gravity) పనిచేస్తేనే గ్రహాలు తిరుగుతాయి... ఇక్కడ మనిషి శరీరంలో కండరాల శక్తి (Muscle Power) పనిచేస్తేనే కాళ్ళు కదులుతాయి. ఆ కదలిక వెనుక ఉన్న అసలైన 'దర్శకుడు' ఒక ఫిజియోథెరపిస్ట్.

"*గ్రహాలన్నీ సూర్యుడి చుట్టూ తిరుగుతున్నట్టు... రేపు హాస్పిటల్స్‌లో డాక్టర్లందరూ ఫిజియోథెరపిస్టుల చుట్టూ తిరుగుతారు!"*

4. శ్వేత వస్త్రం - ఒక నిశ్శబ్ద ప్రమాణం

మిత్రులారా! "శరీరమాద్యం ఖలు ధర్మసాధనమ్". మనిషి ఏదైనా ధర్మాన్ని నెరవేర్చాలంటే అతని శరీరం సహకరించాలి. ఆ శరీరాన్ని సరిగ్గా ఉంచే బాధ్యతను ఈ రోజు మీరు ఈ వైట్ కోట్ ద్వారా స్వీకరిస్తున్నారు. మీరు బాగు చేసేది కేవలం ఒక వెన్నెముకనో, మోకాల్లో కాదు... ఒక మనిషి ఆత్మగౌరవాన్ని! తన కాళ్ళ మీద తను నిలబడాలనే ఒక తపనని!

ఈ తెల్లని కోటు మీద రేపు రక్తపు మరకలు ఉండవు, కానీ ఒక రోగిని నడిపించే క్రమంలో మీ నుదుటి మీద చిందే చెమట చుక్కలు ఉంటాయి. ఆ చెమట చుక్కే మీ వృత్తికి అసలైన గౌరవం.

ముగింపు:

తల్లిదండ్రులారా! మీ బిడ్డలు ఈ రోజు కేవలం డిగ్రీ పొందడం లేదు, నడవలేని వారికి నడకను, ఆశ కోల్పోయిన వారికి ఆశను అందించే 'సంజీవని'లా మారుతున్నారు.

మిత్రులారా! ఈ శ్వేత వస్త్రంతో ఒక కొత్త చరిత్రను సృష్టించండి. మీ స్పర్శ తగిలితే మొండి కండరాలు కూడా స్పందించాలి... మీరు నడిపిస్తే ఈ దేశపు ప్రగతి పరుగులు పెట్టాలి!

"మిత్రులారా, ఈ రోజు ప్రపంచంలో ఎన్నో వైద్య విధానాలు ఉండవచ్చు. MBBS ఒక యుద్ధం అయితే, BAMS ఒక శాంతి మంత్రం కావచ్చు. కానీ ఏ డాక్టర్ అయినా చివరగా రాసే మాట 'Consult a Physiotherapist'. ఎందుకంటే ఆపరేషన్ సక్సెస్ అవ్వడం ఒకెత్తు అయితే, ఆ రోగి మళ్ళీ తన బిడ్డను ఎత్తుకోవడం, తన పని తాను చేసుకోవడం అనేది మరో ఎత్తు. ఆ రెండో ఎత్తుని సాధించే ఏకైక 'సెంట్రిక్ ఫోర్స్' మీరే!

"నరం నరం మీద పట్టు... కండరం కండరం మీద గురి... మీ స్పర్శ ఒక మర్మ విద్య కావాలి. ఆ స్పర్శ తగిలితే నొప్పి భయపడాలి, రోగి ఆత్మవిశ్వాసంతో ఉరకలేయాలి!"

"ఈ వైట్ కోట్ మీ మీద ఉన్నంత కాలం మీ వేళ్ళు ఆయుధాలు కావాలి. అవి శస్త్రచికిత్స చేసే కత్తులు కావు... శారీరక కష్టాలను తరిమికొట్టే శక్తులు. 

విజయోస్తు! జై హింద్!

Dr.Rambabu Ankam. 

Chairman 

RRHET